BE apel liderëve politikë në Kosovë: Në kohën e krizës së pandemisë kërkohet unitet

Shpërndaje

Në një intervistë për Telegrafin, shefja e Zyrës së Bashkimit Europian në Kosovë, Nataliya Apostolova ka folur për zhvillimet e fundit politike në Kosovë, duke bërë thirrje që në situatën pas pandemisë COVID -19, të ketë unitet dhe konsensus politik për të tejkaluar krizën.

Ambasadorja Apostolava deklaron se BE po ndjek nga afër zhvillimet e fundit politike në vend.

“Ne po ndjekim nga afër zhvillimet në vazhdim në Kosovë. Situata aktuale e pashembullt e shpërthimit të COVID-19 bën thirrje për konsensus, unitet politik dhe qëllim të përbashkët në krizë”, u shpreh Apostolova për Telegrafi.

Sipas saj, në këtë kohë partitë politike duhet të kenë unitet për mirëqenien e popullit.

“Partitë politike duhet të kujdesen para së gjithash për mirëqenien e popullit të Kosovës mbi ndonjë interes partiak”, apelon Apostolova.

Në kohën kur krejt bota edhe shtetet individuale po merren me çështjen e menaxhimit të situatës pas shpërthimit të pandemisë me COVID-19, në Kosovë ka shpërthyer kriza politike ndërmjet partnerëve të koalicionit Lëvizjes Vetëvendosje dhe Lidhjes Demokratike të Kosovës.

Kjo erdhi pasi kryeministri Albin Kurti shkarkoi ministrin e Brendshëm, Agim Veliu për të cilin tha se ka shpërndarë panik te qytetarët me deklaratat për koronavirusin.

Ndërkaq LDK ka nisur një mocion i cili është përkrahur deri tani nga AAK dhe NISMA Socialdemokrate për rrëzimin e Qeverisë Kurti.