Kurti: Gënjeshtër heqja e trupave amerikane nga Kosova, ma konfirmoi gjenerali KFOR-it

Shpërndaje

Kryeministri i Republikës, Albin Kurti në fjalimin e tij para deputetëve të Kuvendit, tregoi se çfarë bisedoi dje me komandantin e KFOR-it në Kosovë, Michele Risi.

Ky i fundit, sipas Kurtit, i konfirmoi se nuk do të ketë heqje të trupave amerikane nga Republika e Kosovës.

“Nuk ka tërheqje të trupave. Kjo është një gogol, fantazmë. Dje në takimin me gjeneralin e KFOR-it na u tha”, u shpreh ai.

Kryeministri i Republikës së Kosovës, Albin Kurti, bashkë me ministrin e Mbrojtjes, Anton Quni, u. d. i ministrit të Ministrisë e Punëve të Brendshme dhe Administratës Publike, Xhelal Sveçla, Komandantin e Forcës së Sigurisë së Kosovës, gjenerallejtënant Rrahman Rama dhe drejtorin e Policisë së Kosovës, Rashit Qalaj, priti në takim për herë të dytë brenda një jave Gjeneral Major, Michele Risi, Komandant i KFOR-it në Kosovë dhe këshilltarin e tij politik, Andrea Angeli, me të cilët diskutoi mbi gjendjen e sigurisë në vend me rastin e përhapjes së virusit Corona dhe masave më të fundit të Qeverisë së Republikës së Kosovës për parandalimin e përhapjes së mëtutjeshme të pandemisë COVID 19.

Komandanti Risi, përderisa shprehu mirënjohje për bashkëpunimin mes Qeverisë dhe KFOR-it, po ashtu shprehu edhe gatishmërinë për të thelluar atë. Ai nënvizoi se përball sfidës me të cilën po ballafaqohemi, bashkëpunimi ndërinstitucional është i patjetërsueshëm dhe se ruajtja e sigurisë në Republikën e Kosovës është qëllim i përbashkët.