Jashari: Të gjithë familjet e komunës sonë do të kenë sofrën e Fitër Bajramit të mbushur plotë

Në prag të festës së Fiter Bajramit, Komuna e Skenderajt në bashkëpunim më donatorët, ka nisur radhën e dytë të shpërndarjes së pakove ushqimore e higjienike për 4000 familje në nevojë, përcjell ALBAZONE MEDIA.

Nga buxheti i komunës do të përkrahen gjithsej 2000 familje, duke përfshirë këtu ato familje që janë nën asistencë sociale dhe ato që kanë mbetur pa të ardhura ditore e mujore si pasëojë e sëmundjes COVID-19.

Ndërsa falë vullnetit dhe angazhimit të personave bamirës, pako do të dërgohen edhe për 2000 familje të tjera në nevojë të komunës sonë.

I pari i Komunës së Skenderajt, Bekim Jashari, duke u shprehur falënderues për përkrahjen e donatorëve, tha se nga bashkëpunimi i komunës dhe tyre, në festën e Fiter Bajramit, tryezat e nevojtareve nuk do të jenë boshe.

“Të gjithë qytetarët e komunës sonë do të kenë sofrën e Fitër Bajramit të mbushur plot. Sapo filluam me shpërndarjen e pakove ushqimore për 4000 familje të komunës sonë, duke përfshirë familjet në asistencë sociale dhe familjet të cilët kanë mbetur pa të ardhura në këtë kohë pandemie si pasojë e vendimeve të qeverisë. Nga 4000 pako ushqimore sa do të shpërndajmë sot dhe nesër, 2000 pako ushqimore janë të financuara nga buxheti i komunës sonë dhe 2000 tjera nga donatorë, humanist të ndryshëm, shoqata bamirëse, biznese, organizata vendore e ndërkombëtare dhe bashkëkombës nga diaspora jonë e dashur. Falënderimet së pari i takojnë Zotit të madhërishëm dhe pastaj donatorëve humanistë për përkrahjen e tyre dhënë familjeve në nevojë në këtë situatë emergjente”, deklaroi Jashari.

Për shkak të situatës së krijuar, ai tha se komuna është angazhuar që pakot të dërgohen në çdo fshat apo lagje të qytetit e më pas në çdo shtëpi familjeve në nevojë.

Përzgjedhja e familjeve përfituese të pakove është bërë nga lista e familjeve në asistencë sociale të cilën e posedon Drejtoria për Mirëqenie Sociale, e poashtu edhe nga bashkëpunimi i kryetarëve të fshatrave me komunën, të cilët kanë parë nga afër dhe kanë raportuar për rastet e familjeve nevojtare.

Që nga fillimi i epidemisë në Kosovë e deri me tani, me përkrahjen e komunës dhe donatorëve të shumtë janë shpërndarë pako ushqimore dhe higjienike për rreth 4000 familje me asistencë sociale, kontingjenti i parë në muajin mars dhe prill kurse sot dhe nesër kontingjenti i dytë.