KSHZ: Vonesat, për shkak të orarit të zgjatur të votimit
Komisioni Shtetëror i Zgjedhjeve tashmë ka shpallur rezultatet e para nga zgjedhjet parlamentare. Kreu i KSHZ-së, Oliver Derkoski tha se vonesa për shpalljen e rezultateve ka ndodhur për shkak të zgjatjes së orarit të votimit deri në ora 21:00 për shkak të situatës me pandeminë.
“KSHZ-ja ka procedurë në bazë të të cilës i pranon të gjitha materialet zgjedhore nga Komisionet Komunale Zgjedhore. Gjatë natës dhe deri sot në orët e pasdites KSHZ-ja ka punuar pa ndërprerë dhe i ka pranuar materialet zgjedhore nga KKZ-të. Këtë herë ndoshta kjo u duk pak më gjatë, diku 2-3 orë, por u shkaktua nga arsye të kuptueshme dhe kjo është afati i zgjatur i votimit gjatë ditës së votimit dhe kjo bëri që disa KKZ me materialet e tyre të arrijnë sot pasdite. KSHZ-ja e vërteton materialin zgjedhor vetëm dhe në bazë të procesverbaleve numër 16 të vendvotimeve dhe procesverbaleve numër 21 të KKZ-ve. Për këtë arsye, i përgënjeshtroje të gjitha spekulimet dhe lajmet e rreme që u përhapën sot në opinion. Po ashtu, dua të theksoj se as nga serveri dhe as nga sistemi i KSHZ-së nuk ka pasur dhe nuk ka pasur mundësi të shfaqen informacione me “screenshot” për vendvotime te caktuara që tregojnë rezultate të rreme. Një gjë e tillë nuk ekziston. Këtë e them me përgjegjësi”, tha Oliver Derkoski, kryetar i Komisionit Shtetëror të Zgjedhjeve.
