Jakup Krasniqi përlotet deri sa flet para Speciales: Unë nuk jam as musliman e as katolik, jam shqiptar

Ka përfunduar seanca e parë gjyqësore ndaj ish-zëdhënësit të Shtabit të Përgjithshëm të UÇK-së, Jakup Krasniqi.

Gjatë kësaj seance Krasniqit iu paraqitur edhe një herë aktakuzë për të cilën akuzohet, ku edhe deklaroi se tashmë e ka pranuar atë.

Ndër të tjerash përgjatë seancës, Krasniqi u deklarua jo-fajtor dhe tha se nuk ka asnjë faj të vetëm.

“Unë edhe pse kam pasur një bisedë dje me avokaten mbrojtëse dhe i kam shikuar edhe pikat kryesore të aktakuzës, edhe më herët e thash dhe po e them. Unë nuk ndjehem fajtor e as përgjegjës për asnjë pikë që thuhet në aktakuzë dhe për asnjë gjë tjetër që thuhet në aktakuzë. Unë deklarohem jo-fajtor, nuk kam asnjë faj të vetëm dhe nuk di s’i ta them ndryshe”, tha Krasniqi.

Fjalimi i plotë nga Krasniqi:

Unë duhet të them dy tri çështje dhe do të përpiqem që t’i them goxha shkurtër. Së pari, dua të them këtu, se unë jam arrestuar me 4 nëntor 2020, dhe në aktakuzë po na quani ndërmarrje kriminale të përbashkët. Unë dua të deklaroj, sot, se kurrë në jetën time në asnjë rast të vetëm nuk i kam trajtuar njerëzit aq keq sa më keni trajtuar mua nga ndërtesa e burgut deri në këtë ndërtesë. Theksoi kurrë në jetën time s’kam trajtuar njerëz në këtë mënyrë, s’kam bërë atë, sepse unë luftova vetëm gjenocidin në Kosovë.

E ndjej veten më shumë se mirë, dhe kurrë s’do të dëshiroja të jem në petkun e njerëzve që kanë shpirt krimineli. Jam intelektual. Jam njeri që politikisht e kam luftuar Serbinë. Kurrë në asnjë deklaratë time nuk e kam drejtuar gishtin nga popullsia civile, prandaj në aktakuzë përpiqeni t’i ndani njerëzit në katolik e myslimanë, unë jam shqiptarë as katolik as myslimanë. Kjo është fyese edhe për mua edhe për vendin tim.

Cilësimi i prokurorit se ne qenkemi ndërmarrje kriminale e përbashkët, për mua, shokët e mi, familjen time që luftuam gjatë, por edhe për kombin tonë nuk ka diçka më fyese pasi ne një kohë të gjatë me rrethana tepër të vështira, jetë a vdekje u vumë në shërbim të lirisë e shtet ndërtimit, të cilat i arritëm në bashkëveprim me SHBA-të e BE-në, me NATO-në e OKB-në dhe të gjithë së bashku ishim dhe jemi ndërmarrje e përbashkët çlirimtare dhe shtet formuese.

Ndërsa, ndërmarrje e përbashkët kriminale janë jo vetëm serbët në Serbi, por ishte dhe është koka e saj në Beograd dhe mbështetësit e politikave të Beogradit.

Besoj dhe besoj shumë që këtë e dinë secili qytetar i arsimuar, që së paku është mbi 30 vjet e jeton në vendet e demokracive perëndimore, aty ku janë rritur e edukuar me vlerat e kësaj bote, me vlerat që kanë të bëjnë me liritë e njeriut.

Unë sot s’dua ta zgjasë më shumë, por dua t’u them që unë kam qenë i dënuar nga regjimet kriminale të Jugosllavisë, në vitin 1981-82, e ata më kanë ndaluar pse kam lexuar libra e pse kam fol e kundërshtuar atë regjim, por besoni më shumë kanë pasur ata të drejtë atje, se sa sot që gjendem këtu.

Për mua është bërë një padrejtësi e madhe dhe do ta bajtë edhe këtë padrejtësi, se populli e ka një fjalë “Njeriu është më i fortë se guri e atë që se ban guri e ban njeriu”.

Unë dhe populli im ka bajt shumë padrejtësi dhe nuk kemi pasur nevojë për një të tillë padrejtësi, në seancat e tjera do të them edhe më shumë, veç s’do ta ndjeja veten mirë të isha në shërbim të politikave të krimeve të gjenocidit të Serbisë për të cilat edhe prokurori serb, këto ditë tha pasi është ngrit aktakuza që ka qenë prokuror nga viti 2003, unë mendoj se adresa e qartë e krejt kësaj maskarade është në Beograd dhe tek mbështetësit e politikave të saj, kudo qofshin ato.

***

Ish-kryeparlamentari i Kosovës, Jakup Krasniqi është deklaruar i pafajshëm në seancën gjyqësore ku po paraqitet para Dhomave të Specializuara në Hagë.

Ai është shprehur se nuk ndihet fajtor dhe nuk mban përgjegjësi për veprat që përmenden në aktakuzë.

“Fillimisht nuk kam dëshiruar të kem avokat, por me instimmin e familjes dhe shokëve kam pranuar që të kem avokatin mbrojtës, përndryshe jam i bindur se nuk më duhet avokati. Unë edhe më herët e thash dhe po e them që nuk ndjehem fajtor e as përgjegjës për asnjë pikë që thuhet në aktakuzë dhe për asnjë gjë tjetër që thuhet aty. Unë deklarohem jofajtor. Nuk kam asnjë faj të vetëm, s’di si ta them ndryshe”, ka deklaruar ai.

***

Ish-zëdhënësi i Ushtrisë Çlirimtare të Kosovës, ka thënë se ka menduar të mos marrë avokat mbrojtës dhe të vetëmbrohet në Gjykatën e Hagës.

Në seancën e sotme para prokurorit të Specializuar, Krasniqi tha se nuk ka menduar të marrë avokat mbrojtës, por ishte dëshira e familjes së tij dhe shokve që ta ketë atë.

“Nuk kam menduar të marr avokat mbrojtës, ishte dëshira e familjes dhe e shokëve që të kem avokat dhe e pranova, përndryshe e kam një bindje që nuk më duhet avokati. Nuk mbaj asnjë përgjegjësi të vetme me këtë që akuzohem, as të veprimit e as të mosveprimit, detyra ime ka qenë publike, kryesorja ka qenë zëdhënës i Ushtrisë Çlirimtare të Kosovës, që më ka flejtur më së shumti në shpirt. Unë gjithcka që kam bërë ka qenë publike, jo vetëm në gjuhën shqipe por edhe në gjuhën angleze, gjermane, frënge e italiane. I kam dhënë zë luftës së UÇK-së, nëpër rrethana të vështira. Veprat për të cilat pretendon aktakuza, asnjëra nuk qëndron, unë në muajt në vazhdim do të ofrojë fakte konkrete. Jam tepër i mllefosur sepse këtu gjindem pa të drejtë, unë duhet të jem në vendin tim, në familjen time”, ka thënë Krasniqi.

***

Ish-kryeparlamentari dhe ish-zëdhënësi i Ushtrisë Çlirimtare të Kosovës (UÇK), Jakup Krasniqi është emocionuar teksa ka folur në paraqitjen e parë para Gjykatës Speciale. Ai ka pasur kritika të ashpra për këtë gjykatë, derisa në jo pak momente emocionuese gjatë deklarimit të tij, atij i është dridhur zëri.

“Unë dhe populli im kemi mbajtë shumë padrejtësi dhe nuk kemi pasë nevojë për një tjetër padrejtësi”, tha Krasniqi, duke e ndërprerë fjalinë në gjysmë pas emocioneve.

“S’do të ndihesha mirë të isha në shërbim të politikave të krimit dhe gjenocidit të Serbisë”, theksoi Krasniqi.

I emocionuar, ai foli për përpjekjen e UÇK-së për çlirimin e Kosovës. Ai tha se Gjykata Speciale është adresa e akuza ndaj tij.

***

Ish-kryeparlamentari i Kosovës, Jakup Krasniqi ka marrë fjalën shkurtimisht para Gjykatës Speciale, ku po paraqitet për herë të parë.

Krasniqi e ka kritikuar ashpër cilësimin e Speciales si “ndërmarrje e përbashkët kriminale” kur përshkruajnë anëtarët e Shtabit të Përgjithshëm të UÇK-së.

“Në aktakuzë po na quani ndërmarrje e përbashkët kriminale. Unë deklaroj sot se kurrë në jetën time, në asnjë rast të vetëm nuk i kam trajtuar njerëzit as kaq, sa e si më trajtuat mua, nga ndërtesa e burgut e deri në këtë ndërtesë. E theksoj, s’kam trajtuar kurrë kështu njerëz”, ka thënë ndër tjerash Krasniqi.

***

Krasniqi e ka kritikuar ashpër cilësimin e Speciales si “ndërmarrje e përbashkët kriminale” kur përshkruajnë anëtarët e Shtabit të Përgjithshëm të UÇK-së.

“Në aktakuzë po na quani ndërmarrje e përbashkët kriminale. Unë deklaroj sot se kurrë në jetën time, në asnjë rast të vetëm nuk i kam trajtuar njerëzit as kaq, sa e si më trajtuat mua, nga ndërtesa e burgut e deri në këtë ndërtesë. E theksoj, s’kam trajtuar kurrë kështu njerëz”, ka thënë ndër tjerash Krasniqi.

***

Ka nisur seanca gjyqësore ku ish-kryeparlamentari i Kosovës, Jakup Krasniqi është paraqitur për herë të parë para Dhomave të Specializuara, që njihen si Gjykata Speciale.

Në paraqitjen e parë, Krasniqi ka të drejtë ta zgjedh një avokat mbrojtës ose kjo t’i caktohet nga Specialja. Në këtë paraqitje, atij i lexohen akuzat dhe informohet se brenda 30 ditësh duhet ta deklarojë fajësinë apo pafajësinë në lidhje me to. Ai mund të deklarohet rreth fajësisë apo pafajësisë qysh në paraqitjen e parë.

Të mërkurën, ish-kryeparlamentari Jakup Krasniqi u arrestua dhe u dërgua për në paraburgimin e Dhomave të Specializuara. Për në të njëjtin destianacion, me një avion ushtarak, të nesërmen u nisën edhe ish-bashkëpunëtorët e tij në luftë, ish-presidenti Hashim Thaçi, ish-kryetari i PDK-së, Kadri Veseli dhe shefi i Grupit Parlamentar të LVV-së, Rexhep Selimi.

Arrestimet erdhën pasi një gjyqtar i procedurës paraprake i Gjykatës Speciale, ka konfirmuar aktakuzat ndaj katër ish-krerëve të UÇK-së.

Ata akuzohen për krime lufte dhe krime kundër njerëzimit. Aktakuza i bën përgjgjës Thaçin, Veselin, Krasniqin e Selimin për një sërë krimesh që pretendohet se janë kryer në disa qendra ndalimi gjatë viteve 1998-1999. Prokuroria e Specializuar i akuzon krerët e UÇK-së se kanë qenë ose duhej të ishin në dijeni të këtyre krimeve.