Albin Kurti e Arben Vitia prezantojnë masat e reja antiCOVID-19 (Video)

Shpërndaje

Kryeministri i vendit, Albin Kurti ka folur pas mbledhjes së Qeverisë së Kosovës.

Derisa ka arsyetuar vendimin e marrë për masat e reja anti- covid, Kurti tha se këtë vendim e kanë marrë pas propozimit nga Ministria e Shëndetësisë, dhe është shqyrtuar nga ana e ministrave të linjës.

Ndërsa, ministri i Shëndetësisë Arben Vitia ka theksuar se situata në teren nuk është e mirë, prandaj, ka shtuar ai, masat kanë qenë të domosdoshme.

Qeveria e Kosovës sot ka marr vendim për masat e reja antiCOVID-19, ndërsa ndër masat e reja do të jetë ndalim qarkullimi i qytetarëve nga ora 22:00-05:00 përveç në rastet emergjente, ndalimi i aktiviteteve të gastronomisë përveç shërbimit “merr me veti” si dhe kalimi në formën online të mësimit për ciklin parauniversitar dhe universitar.

Me këto masa ndalohet veprimtaria e qendrave të mbyllura tregtare, përveç shërbimeve esenciale në kuadër të tyre siç janë marketet ushqimore dhe farmacitë si dhe shërbimet e gastronomisë obligohen të pezullojnë aktivitetin e tyre nga data 7 prill deri më datë 18 prill, ndonëse në draft vendim thuhej se zbatimi i masave të reja do të fillojë nga data 6 prill.

“Të gjitha institucionet publike dhe private të arsimit parauniversitar (nga data 12 prill deri me 18 prill), dhe të gjitha institucionet publike dhe private universitare nga data (6 prill deri me datë 18 prill) obligohen që të organizojnë online të gjitha aktivitetet mësimore. Institucionet parashkollore vazhdojnë aktivitetin normalisht, duke i respektuar masat dhe rekomandimet kundër COVID-19”.

Në vendim thuhet se institucionet publike dhe private obligohen që të paraqitet në punë vetëm stafi i cili kryen shërbime esenciale. Përgjegjësit e institucioneve publike dhe private obligohen të definojnë stafin esencial për nevojat e institucionit me hyrjen në fuqi të këtij vendimi.

Bartja e maskës duke mbuluar hundën dhe gojën është obligative, në të gjitha rastet përveç: gjatë ngasjes së automjetit vetëm apo me anëtarët e ngushtë të familjes, gjatë vrapit dhe çiklimit dhe gjatë ecjeve jashtë zonave të banuara dhe jo në grupe me më shumë se 4 persona të të njëjtës familje.

Ndalohen të gjitha grumbullimet me rrezikshmëri të lartë të shpërndarjes së infeksionit, me më shumë se 10 persona, (mbledhjet, seminaret, trajnimet, dasma, ahengje familjare, homazhe, e të ngjashme).