Ambasada Britanike: Dua Lipa, krenaria e Britanisë dhe Kosovës

Shpërndaje

Këngëtarja me renome botërore e origjinë nga Kosova, Dua Lipa, këto ditë po qëndron në Prishtinë pasi ka marrë pjesën në festivalin tashmë të njohur “Sunny Hill”, një festival i cili në edicionin e dytë në vendin tonë solli artisten e njohur amerikane Miley Cyrus, DJ-in skocez Calvin Harris dhe reperin shqiptaro-amerikan Gashi.

Lipa sot ka qenë për vizitë në Ambasadën e Britanisë së Madhe ku është takuar me ambasadorin Ruairi O’Connell, transmeton Koha.net. Po ashtu, këngëtarja 23-vjeçare ka qenë e shoqëruar nga babai i saj, Dukagjin Lipa.

Lipa mori pjesë në takimin që është mbajtur në Rezidencën e Britanisë në Kosovë mes artistëve, kreatorëve, aktivistëve të cilët sjellin ndryshime në vendin tonë përmes muzikës, artit, kulturës, etj.

Në një postim në Facebook për këtë takim, Ambasada e Britanisë në Kosovë e ka cilësuar këngëtaren 23-vjeçare si “krenaria e Britanisë dhe Kosovës”.

“Kurrë mos harroni se nga jeni. Krenaria e Britanisë dhe Kosovës, Dua Lipa, kaloi një pasdite në Rezidencën e Britanisë në takimin e artistëve dhe kreatorëve, vullnetarëve dhe aktivistëve duke sjellë ndryshime në Kosovë përmes muzikës, artit, kulturës, inovacionit dhe sportit”, ka shkruar Ambasada Britanike në Kosovë përmes një postimi në Facebook.

Gjithashtu, ambasadori O’Connell ka shpërndarë një fotografi në Facebook ku shihet bashkë me Dua Lipën.

“Me Dua Lipën këtë pasdite, duke festuar talentet e rinj kosovarë në art, sport dhe modë”, ka shkruar ambasadori O’Connell.

FOTO: https://www.facebook.com/UKinKosovo/