Kurti thotë se do t’i çlirojnë gjyqtarët e prokurorët nga eprorët lepurushë

Lëvizja Vetëvendosje ka mbajtur sot tubim në Gjilan,

Në fjalimin e tij, kandidati për kryeministër, Albin Kurti, mes zotimesh për ta çliruar shtetin siç thotë ai, nga kapja, gjyqtarët e prokurorët nga eprorët lepurushë, gratë nga dhunuesit, punëtorët nga shfrytëzimi e veteranët nga mujsharët e luftës, u zotua se do ta sjellin ligjin e ri të punës.

Ai tha se do ta pesëfishojnë numrin e inspektorëve të punës që të garantojmë cilësi e siguri në punë.

“Do ta themelojmë gjykatën e punës dhe qeveria jonë do të jetë komplementare e bashkëpunuese në përpjekjet e sindikatave në përmirësimin e kushteve të punës e të drejtave të punëtorëve e kurrsesi pengesë për ta. Kosovën e kemi trashëgim nga gjaku i dëshmorëve dhe djersa e punëtorëve ndërkaq e kemi marrë hua nga fëmijët e porsalindur e ata që akoma nuk kanë lindur. Gjithkah duhet të punojmë, gjithçka duhet të shpëtojmë e shumëçka do të fitojmë”, ka thënë ai.

Në hapje, tubimin e nderoi deputeti i Partisë Social-Demokrate në Bundestagun gjerman, Stefan Schwartze.

Ai në fjalën e tij drejtuar të pranishmëve tha se ai ka ardhur në Kosovë për ta mbështetur Kurtin për kryeministër.

“Unë jam këtu sot sepse mendoj se ju qëndroni përpara një momenti historik. Besoj se e keni shansin e madh për ndryshimin e madh në Kosovë. Në këto zgjedhje varet edhe perspektiva e ardhshme e Kosovës”, tha deputeti gjerman duke shtuar se, unë kam ardhur që ta mbështes Albinin për kryeministër e shpresoj që edhe ju e keni guximin ta mbështesni Albinin për kryeministër”, ka thënë ai.

Ndërkaq kandidati Nevzad Isufi, tha se bashkë me qytetarët, Lëvizja po kërkon ndryshim, zhvillim, shtet, parime, barazi e mirëqenie të cilat kanë munguar deri në 6 tetor, sepse sipas tij, një epokë e re po vjen.

Sipas tij Gjilani pa ujë e me lumenj e ambient të ndotur do ta ketë përkrahjen e qeverisë Kurti për ta mbrojtur mjedisin e për t’ia siguruar shërbimet bazike publike. Ndërsa kandidatja tjetër nga Gjilani,

Arijeta Rexhepi, u zotua se Lëvizja do të punojë për një vend ku mund t’i paramendojmë fëmijët tanë të rriten, jetojnë e punojnë me dinjitet në vendin e tyre.

Kandidati Alban Hyseni tha se vetingu do të bëhet e do të jetë gardian i përhershëm i sistemit të drejtësisë e sigurisë, duke thënë më tutje se drejtësia e barazia janë baza dhe thelbi i rendit dhe i rregullit në shoqëri dhe drejtësia e barazia do të shërbejnë si rregullatorë të fushave të tjera në shoqërinë tonë pas 6 tetorit

Kandidatja Tinka Kurti si aktiviste e zëshme e çështjes së gruas, denoncoi dhunën, shfrytëzimin, izolimin dhe përjashtimin e grave nga sfera publike e jetës e tha me bindje se ditë të bardha po na presin vendin pas 6 tetorit.