“Dua të kthej Prishtinën dhe Beogradin në bisedime”, Palmer flet pas detyrës së re

I sapoemëruari si përfaqësues i posaçëm i SHBA-ve për Ballkanin Perëndimor, Matthew Palmer ka dhënë një intervistë për “Tanjug”, ku ka folur lidhur me dialogun mes Kosovës dhe Serbisë.

“Qëllimi im është që t’i kthejë Beogradin dhe Prishtinën në tryezën e bisedimeve sa më shpejt të jetë e mundur dhe të sigurojë një marrëveshje”, ka thënë ai në intervistë.

“Zgjidhja e çështjes së Kosovës është shumë e lartë në axhendën time. Ne kemi mundësinë dhe ne duam ta shfrytëzojmë”, thekson Palmer.

I dërguari special i SHBA-ve thotë se qëllimi afatshkurtër i Uashingtonit është kthimi i Beogradit dhe Prishtinës në tryezën e bisedimeve.

“Ne kemi zgjedhje në Kosovë më 6 tetor, dhe ato do të mbahen në Serbi në pranverë. Ne do të kemi mundësinë që të vazhdojmë negociatat midis dy zgjedhjeve, të cilën duhet ta shfrytëzojmë. Shpresojmë që të dyja palët të shfrytëzojnë këtë mundësi”, shtoi.

Palmer shtoi se ka shpresë se qeveria e re e Kosovës do të pranonte të pezullojë tarifat për të lejuar që dialogu të rifillojë, dhe se Beogradi do të ndalë lobimin tek vendet e tjera për të tërhequr njohjen. E gjithë kjo, sipas fjalëve të tij, “helmon atmosferën” dhe e bën të vështirë kthimin në negociata me një frymë konstruktive. Palmer nuk e fsheh që Uashigtoni do të dëshironte ta shihte njohjen e ndërsjellë si pikën qendrore të marrëveshjes.